Marrëveshje me BE-në për inovacione

Maqedonia dhe Bashkimi Evropian, nënshkruan sot marrëveshje bashkëpunimi për pjesëmarrje në  programin  kornizë  për hulumtim dhe inovacione, “Horizont 2020”.

Ky program paraqet  instrument financiar  të Bashkimit Evropian për mbështetje  të  hulumtimit  dhe  inovacioneve,  me qëllim të  krijimit  të vendeve  të  reja  të  punës,  rritjes  ekonomike  dhe  konkurrencës  në Evropë. Marrëveshjen në emër të Qeverisë së Maqedonisë e nënshkroi ministri i Arsimit dhe Shkencës, Abdylaqim Ademi.

“Marrëveshja do të sigurojë mundësi për bashkësinë tonë shkencore, hulumtuese dhe të biznesit,  për bashkëpunim më të afërt në arritjen e qëllimeve të përbashkëta, rimëkëmbje ekonomike të  Evropës  dhe  tejkalim  të  problemeve  të  mëdha që  e  brengosin popullin. Bashkëpunimi  midis Bashkimit Evropian dhe Republikës së Maqedonisë, në këtë sferë nuk është  i  ri,  vendi  ishte  anëtar  i  suksesshëm  edhe  në programin  e  7-të  kornizë me  mbi  100  projekte  të  financuara, posaçërisht  në  fushat  e   teknologjisë  informative  e  komunikuese, energjisë, bujqësisë dhe sigurisë së ushqimit”, deklaroi ministri i Arsimit dhe Shkencës, Abdylaqim Ademi.

Pjesëmarrja  aktive  e  Republikës  së  Maqedonisë  në  këtë  program, siguron qasje ndërkombëtare  në  hulumtimet  dhe  inovacionet  e bashkësisë shkencore dhe të biznesit nga vendi, nxitje të  mobilitetit,bartjes së njohurive dhe teknologjive, si dhe qasje deri te ekspertiza e nivelit më të lartë në fushat përkatëse. (Rejhane Bushi-Metaj, TVM2)