Edhe dy të arrestuar për dhunën në Kuvend. MPB ka informacione për 12 të akuzuarit e tjerë

Gjykata Penale shqiptoi paraburgim prej 30 ditësh për M. M. dhe S. M. që akuzohen se kanë nxitur dhe ushtruar dhunë natën e 27 prillit në Kuvend. Në ndërkohë, ministri i brendshëm, Oliver Spasovski, tha se Policia punon për t’i gjetur dhe për t’i sjellë para organeve të drejtësisë edhe dymbëdhjetë personat e tjerë të akuzuar në këtë rast.

 

Spasovski nuk i publikoi emrat e personave në kërkim dhe nuk dha detaje për veprën që akuzohen. Për ata të cilët janë në arrest për këtë rast, e janë të punësuar në MPB, Spasovski tha se do të merren masa të duhura në përputhje të ligjit.

 

"Janë dhënë urdhra për arrestimin e 36 personave, ndërsa 12 persona akoma janë në kërkim, ata me siguri janë në Republikën e Maqedonisë. Të gjithë ata të cilët janë të punësuar në MPB, nëse u caktohet masë arresti, pas raportimit marrëdhënia e tyre e punës pezullohet. Për ata për të cilët deri më tani nuk është udhëhequr procedurë disiplinore, hapet mundësia për ngritjen e kësaj procedure”,- deklaroi ministri i Brendshëm, Oliver Spasovski.

 

Spasovski nuk dha informacione se a posedojnë ose jo këta persona shtetësi të dyfishtë. Por, ai sqaroi se obligimi i Prokurorisë dhe të Gjykatës është nëse do të shpallë ose jo fletarrestim për ta dhe a do të rritet numri i të akuzuarve për dhunën në Kuvend.

 

Gjykata Penale deri tani ka shqiptuar paraburgim prej 30 ditësh për gjithsej 15 persona, në mesin e të cilëve është dhe ish-ministri i brendshëm, Mitko Çavkov, deputetët, Zhaklina Peshevska dhe Igor Drullovski, ndërsa pritet Gjykata Penale të marrë vendim edhe për ankesat e parashtruara të palës mbrojtëse për masën e paraburgimit.