Efikasiteti energjetik, Bekteshi: vazhdojmë me subvencionimet

Sipas ministrit të resorit, Kreshnik Bekteshit, nga subvencionimi i kolektorëve diellorë për ujë të ngrohtë kanë përfituar 1794 amvisëri, një mijë amvisëri më shumë se vitin e kaluar.

 

Me rebalancin e vitit 2017 janë paraparë 16 milion denarë shtesë për masën e zëvendësimit të dritareve të drurit me ato PVC.

 

Bekteshi u zotua se subvencionimet e këtilla do të vazhdojnë edhe gjatë vitit të ardhshëm.  

 

“Në vazhdimësi do të krijohen politika sektoriale që do të kontribuojnë në reduktimin e konsumit të energjisë elektriike, duke përcaktuar masat specifike që do të zbatohen në amvisëri. Edhe në buxhetin e vitit 2018 ne do të vazhdojmë të subvencionojmë sektorin rezidencial duke prezantuar programin e ri për të gjithë qytetarët të cilët do të blejnë shporet për djegie efikase për ngrohje. Gjithashtu masat për vendosjen e kolektorëve diellorë dhe zëvendësimin e dritareve të drunjve në ato PVC do të vazhdojnë edhe në të ardhmen”,- deklaroi ministri i Ekonomisë, Kreshnik Bekteshi.

 

Këto masa shërbejnë jo vetëm për ruajtjen e ambientit jetësor, por edhe për zvogëlimin e faturave të energjisë elektrike dhe në nxitjen e përdorimit të energjisë alternative nga ana e qytetarëve, theksoi Bekteshi.

 

I pyetur, ndërkohë, nëse do të tërhiqen kufizimet për shitje të alkoolit, Bekteshi tha se bisedimet ende vazhdojnë, por Ministria e Ekonomisë do të propozojë që kufizimi të pezullohet.