Dorëhiqet kryetari i VV-së, Visar Ymeri, shkas linçimet dhe shpërfillja

Duke arsyetuar dorëheqjen, Ymeri tha se në thelb të organizimit të saj Vetëvendosje ka pasur tri shtylla: besnikërinë ndaj konceptit politik, besimin e ndërsjellë mes aktivistëve të bazuar në vlerën fondamentale të barazisë, si dhe vetëmohimin, të cilat vitin e fundit, sipas tij, kanë filluar të rrënohen.

 

“Jemi përballur me një fushatë sistematike të shpifjeve insinuatave, linçimeve dhe etiketimeve nga më të ndryshmet. Njerëzit janë quajtur abuzues e bashkëpunëtorë shërbimesh. Njerëzit që e kanë shpërndarë një propagandë të këtillë vazhdimisht janë thirrur në emrin e Albin Kurtit”,- tha kryetari i deritanishëm i Vetëvendosjes, Visar Ymeri.

 

Ymeri tha se këtë metodë nuk e pëlqen dhe nuk e mbështet, prandaj edhe si rezultat i asaj se nuk arriti të ndalë këtë përçarje brendapartiake, ai jep dorëheqje të parevokueshme nga të gjitha pozitat në Vetëvendosje.

 

Dorëheqja e Ymerit vjen pas paraqitjes së kandidaturës së Albin Kurtit për t’u rikthyer në postin e kryetarit të Vetëvendosjes, me çka duket se nuk janë pajtuar grupi i Ymerit. Pas lirimit nga paraburgimi, Albin Kurti ka deklaruar se Vetëvendosje ka nevojë për reformë organizative.

 

Ndërsa përçarja në Vetëvendosje nisi me një ofendim që deputetja, Aida Dërguti, e kishte bërë për Kurtin, pas çka filluan përplasjet publike që çuan në dorëheqjen e Dërgutit, sekretarit organizativ, Dardan Mulliqajt, dhe së fundmi edhe kryetarit të deritanishëm, Visar Ymerit.