Trump: Sanksionet po ndikojnë te Pheniani

Presidenti amerikan, Donald Trump, vlerëson se bisedimet në mes të Koresë Veriore dhe Koresë Jugore janë shenjë se Pheniani është duke u ndikuar nga sanksionet që i janë vënë, pas testimeve të raketave balistike dhe armëve bërthamore.

“Sanksionet dhe presionet e tjera kanë filluar të kenë ndikim të madh tek Koreja Veriore. Ushtarët janë duke ikur me rrezik drejt Koresë Jugore”,- ka thënë Trump përmes një postimi në Twitter.

“Njeriu i raketave tani dëshiron të bisedojë me Korenë Jugore për herë të parë. Ndoshta ky është lajm i mirë, ndoshta jo, do të shohim”,- ka thënë presidenti Trump.

Këto reagime të Trumpit kanë ardhur pas deklaratave të liderit veri-korean, Kim Jong Un, se ka mundësi për zhvillimin e bisedimeve në mes të dy vendeve për të diskutuar pjesëmarrjen e një ekipi të Koresë Veriore në Lojërat Olimpike Dimërore që nisin muajin tjetër në Pieonçang.