FRODEM letër Ivanovit dhe Zaevit: Po bëhet presion, dilni me rezolutë në OKB

FRODEM kërkon nga presidenti, Gjorge Ivanov, dhe kryeministri, Zoran Zaev, të dorëzojnë një projekt-rezolutë në Asamblenë e Përgjithshme të Organizatës së Kombeve të Bashkuara rreth presioneve, që sipas tyre po bëhen për ndryshimin e emrit të Maqedonisë.

“Duke u ballafaquar me presion për ndryshimin e emrit kushtetues, si dhe qëndrimet joparimore dhe ofenduese që vijnë nga partitë parlamentare në Greqi, kërkojmë nga presidenti dhe kryeministri që të dorëzohet projekt-rezolutë nga ana e Maqedonisë në Kuvendin e Përgjithshëm të Kombeve të Bashkuara. Jemi të sigurtë që argumentet e parashtruara janë në anën tonë dhe anëtarët e Kuvendit të Përgjithshëm të OKB-së do të sjellin vendimin e duhur në interes të drejtësisë dhe vërtetës”,- thuhet në letrën e FRODEM drejtuar krerëve të shtetit dhe ekzekutivit.

Reagimi i FRODEM-it vjen pas deklaratave të politikanëve grekë rreth kontekstit mes dy vendeve dhe protestave që kanë filluar në shtetin fqinj.