Trump: Kina dhe Rusia, rivalë që duhet të konfrontohen

Presidenti amerikan, Donad Trump, e ka përshkruar Kinën dhe Rusinë si rivalë, të cilët duhet të konfrontohen me “fuqi të pakonkurrencë” dhe i ka bërë thirrje Kongresit për t’i përmirësuar “të metat fondamentale” në marrëveshjen madhore atomike ndërmjet fuqive botërore dhe Iranit. Këto komente ai i ka bërë mbrëmë vonë në fjalimin e tij të parë drejtuar kombit, në seancën e përbashkët të Kongresit të Shteteve të Bashkuara. 

Fjalimi i gjatë afro 80 minutash ishte i përqendruar kryesisht në çështjet e brendshme amerikane, siç është ndërtimi i infrastrukturës së dëmtuar të vendit, apo reformimi i politikave të imigrimit. Por, megjithatë ai është përqendruar edhe në sfidat madhore të politikës së jashtme me të cilat ballafaqohen Shtetet e Bashkuara. Në këtë kuadër, ai u është referuar “regjimeve të papërgjegjshme, grupeve terroriste dhe rivalëve si Kina e Rusia, që i sfidojnë interesat, ekonominë dhe vlerat” amerikane.