BERZh mbështet qeverinë me 500 mijë euro, stimulohet energjia diellore dhe ajo e erës

Me gjysmë milion euro, Banka Europiane për Rindërtim dhe Zhvillim do ta mbështesë Qeverinë që të zhvillojë bazë ligjore dhe administrative për rritjen e burimeve të rinovueshme të energjisë dhe shfrytëzimin e tyre në Maqedoni, kryesisht në fushën e impianteve diellore dhe të erës me qëllim që të zvogëlohet importi i energjisë elektrike dhe qymyrgurit.

 

“Bëhet fjalë për një strategji të plotë për rritjen e fuqisë së energjisë diellore në Maqedoni, e cila tani është vetëm 16.8 megavat, e që është për të ardhur keq për një vend me diell të bollshëm. Me ndihmën teknike të BERZh-it, qeveria në periudhën e ardhshme do të angazhohet për krijimin e centraleve solare me fuqi prej 200 megavatësh, ndërkaq do të zhvillojë një strategji që nuk do të ndikojë në çmimin e energjisë për konsumatorët”,- deklaroi zëvendëskryeministri, Koço Angjushev.

 

Me këto mjete do të ndihmohet zbatimi i një sistem ankandi, thonë nga Banka Europiane për Rindërtim dhe Zhvillim. 

 

“Mbështetja teknike do të fokusohet në përgatitjen e legjislaturës sekondare dhe rregullat e rregullatorit që janë të patjetërsueshme për të zbatuar një proces tenderues kompetitiv në përputhje me ligjin e ri për energjetikë. Konsulenti do të sigurojë mbështetje për qeverinë që të përgatitet procesi tenderues për energjinë diellore dhe të erës”,- tha drejtori i BERZh për EQJL, Sharllot Rue.

 

Qeveria pret që BERZh t’i financojë projektet e ELEM-it për ndërtimin e centraleve me energji diellore me kapacitet prej 10 megavatësh tek miniera e Osllomesë si dhe zgjerimin e parkut për energji nga era në Bogdanci.