Dy kongreset e Lëvizjes BESA, analistët: pushtetit i duhet një opozitë e fortë

Shqiptarëve u nevojitet opozitë e fuqishme. Mendimin opozitar po e proklamojnë mediat dhe jo partitë politike opozitare të cilat duhet të jenë të unifikuara në luftën kundër pozitës, vlerësuan analistët në “Argument” në TVM2.

 

Aktualisht kemi një opozitë të papjekur e cila nuk di të udhëheq me politikat madhore në shërbim të kombit të vet, vlerëson politologu, Xhenis Sulejmani, duke komentuar dy fraksionet e Lëvizjes Besa. 

 

“Një opozitë pa qëndrim të unifikuar, të përçarë, një opozitë e cila merret me bajraktarizëm, mendoj se nuk do të jetë e denjë për të përmirësuar dhe për të ndryshuar, por edhe për të përmirësuar pozitën”,- tha politologu, Xhenis Sulejmani.

 

Gjithsesi, analistët presin vendimin e gjykatës pas 24 shkurtit se cili krah i Besës do të ketë legjitimitetin pas dy kongreseve. Në pyetjen se a do t’i ndihmojë PDSh krahut të Afrim Gashit dhe a do vazhdojë krahu tjetër i Besës bashkëpunimin me partinë e Ziadinë Selës, analistët dhanë përgjigje se në çfarëdolloj kombinimi, fakt është se sërish opozita mbetet e përçarë.

 

“Ndoshta në të ardhmen mund të kemi ndonjë ndryshim të strukturës për t’i fuqizuar ata, sepse Gashit i nevojitet Tetova dhe Gostivari, sigurisht që PDSh mund t’i ndihmojë shumë krahut të  Shkupit, po do të shohim në të ardhmen se si PDSh-ja do të manovrojë në këtë konfigurim ndërpartiak. Tani preferencat mund të jenë të ndryshme, prandaj duhet parë se si pas 24 shkurtit do të lëvizin punët”,- theksoi analisti i çështjeve politike, Selim Ibrahimi.

 

“Ideologu edhe para zgjedhjeve lokale dha sinjale se BESA e reformuar do të shkojë drejt bashkëpunimit me partinë e Thaçit, BESA tjetër e Bilall Kasamit do të vazhdojë bashkëpunimin me partinë e z. Sela dhe përsëri opozita ngelet e përçarë”,- tha opinionisti, Artin Spahiu.

 

Analistët vlerësojnë se në mungesë të frymës opozitare duhet të krijohet Qeveri nën hije ku sektorët e udhëhequr nga pala maqedonase duhet të kenë ministër nën hije nga partitë politike shqiptare, në mënyrë që të krijohet kriticizëm dhe politikanët të jenë të kujdesshëm për veprimtarinë që ushtrojnë.