Në Sllovaki arrestohen dy të dyshuar për vrasjen e gazetarit Kuciak

Policia sllovake arrestoi dy persona të cilët kanë planifikuar të furnizojnë armë dhe të shkojnë në fshatin Velka Maça më 23 shkurt dhe të cilët ndërlidhen me vrasjen e gazetarit Jan Kuciak dhe të fejuarën e tij, kumtoi një përfaqësues policor.

 

Siç paraprakisht transmetoi MIA, policia pardje ka kryer bastisje në shtëpitë e personave, të cilët paradokohe kanë qenë të dyshuar për tregti me drogë. Bastisjet janë kryer në afërsi të fshatit Velka Maça. Së pari u kumtua se në operacion u arrestua një i dyshuar për të cilin supozohet se është i lidhur me vrasjen. Janë konfiskuar 160 gramë nga droga Pervetin, armë të ftohta dhe armë zjarrit, të cilat janë dërguar në ekspertizë balistike.

 

Trupat e Jan Kuciak dhe të fejuarës së tij të dielën janë gjetur në banesën e tyre në Velka Maça, ndërsa supozohet se janë vrarë pasi ka hetuar akuza për pagesa joligjore të fondeve të BE-së përmes mashtrimeve tatimore, ku janë involvuar shtetas sllovakë dhe italianë të lidhur me mafian italiane Ndrangeta. 

 

Mijëra njerëz mbrëmë u tubuan në qendër të Bratisllavës që të mbajnë marsh komemorativ në shenjë të kujtimit të gazetarit të vrarë. Pjesëmarrësit në protestë kanë mbajtur qirinj, transparentë dhe fotografi të gazetarit.

 

Tubimin e organizoi partia opozitare Njerëz të Zakonshëm dhe ka kaluar në qetësi. Për nesër u paralajmërua edhe një marsh protestues, të cilin do ta organizojnë gazetarë dhe organizata civile./mia