KÇZE vendosi: Ajdari në kushtetuese, Solev dhe Ilievski në KPP

Komisioni për Çështje të Zgjedhjeve dhe Emërime në Kuvendin Republikan konstatoi propozimet për zgjedhjen e një anëtari në Gjykatën Kushtetuese dhe dy anëtarëve të Këshillit të Prokurorëve Publikë.

Naser Ajdari - jurist i diplomuar dhe prokuror shtetëror, u propozua gjykatës i ri në Gjykatën Kushtetuese, ndërsa ish-gjykatësi, Angel Solev, dhe avokati, Angele Ilievski, u propozuan për anëtarë të rinj të Këshillit për Prokurorë Publikë.

Për kandidatët e propozuar të Komisionit nuk kishte debat. Deputetët e VMRO-DPMNE nuk morën pjesë në punën e Komisionit, por përmes një kumtese për media u ankuan se shumica parlamentare po shfrytëzon mungesën e tyre, siç thonë, për partizimin që kësaj radhe po bëhet në Gjykatën Kushtetuese dhe në Këshillin për Prokurorë Publikë.

“Zgjedhja e Naser Ajdarit, funksionar i BDI-së, në vendin e  zbrazët në Gjykatën Kushtetuese dhe zgjedhja e Angell Solevit dhe Angele Ilievskit, që sipas shkrimeve të mediave janë anëtarë të komitetit juridik të LSDM-së, paraqet partizim klasik të këtyre dy organeve”,- theksohet në kumtesë.