Presidenti Meta takim me Komisionin e jashtëm, analizohen negociatat me Greqinë

Presidenti shqiptar, Ilir Meta, ka thirrur në një takim deputetët anëtarë të Komisionit të Politikës së Jashtme në lidhje me çështjen e negociatave me Greqinë. Presidenca njofton se Meta në takim ka nënvizuar rëndësinë e marrëdhënieve dhe të fqinjësisë së mirë me Greqinë dhe informoi deputetët me qëndrimin e tij ndaj kësaj çështjeje, duke nënvizuar se për arritjen e një marrëveshjeje të drejtë dhe të qëndrueshme kërkohet bashkëpunim dhe seriozitet nga të gjitha institucionet.

Presidenti Meta theksoi se vlerëson frymën bashkëpunuese dhe konstruktive, që karakterizoi bashkëbisedimin me deputetët e Komisionit Parlamentar për Politikën e Jashtme.

Në përfundim të takimit, deputetët e opozitës u shprehën se edhe mazhoranca ra dakord që qëndrimi i presidentit ishte korrekt. Ndërsa Tritan Shehu tha se çështja duhet të dërgohet në Gjykatën Ndërkombëtare.