Rriten tensionet mes Ankarasë dhe Athinës

Marrëdhëniet mes Ankarasë dhe Athinës janë në pikën më kritike pas deklaratës së Ministrisë së Jashtme Turke,  e cila i kërkoi presidentit grek, Prokopis Pavlopulos, të respektojë të drejtën ndërkombëtare dhe kufijtë e shtetit turk. Turqia i bën thirrje Athinës të ndalojë retorikën e dëmshme.

“Nëse historia na detyron, atëherë do të veprojmë si paraardhësit tanë”,- thuhet në deklaratën e Ministrisë së Jashtme të Turqisë.

Tensionet mes vendeve u rritën pas arrestimit të dy oficerëve grekë. Së fundmi, ShBA-të kanë rritur praninë e forcave detare në Mesdhe, për shkak të shqetësimit të shkaktuar nga sjelljet e fundit të Ankarasë.

Nga ana tjetër, kryeministri grek, Aleksis Tsipras, në mbledhjen urgjente të së martës vendosi të ndjekë rrugën e diplomacisë dhe durimit mbi retorikën me Turqinë.

Gjithashtu, Cipras zhvilloi një bisedë telefonike me sekretarin e OKB-së, Antonio Gutierres, me të cilin diskutoi për një sërë çështjesh, përfshirë tensionet me Turqinë, marrëdhëniet me Shqipërinë, si dhe çështjen e emrit me Maqedoninë.