Ushqimi në kopshte dhe shkolla, sanksione për ata që nuk i respektojnë standardet

Mungon vetëdija për ndikimin që mund të ketë jo vetëm në shëndetin e fëmijës, por edhe në aftësinë e tij për mësim kjo mënyrë e të ushqyerit që iu ofrohet fëmijëve tanë, sidomos në periudhën kur ata hanë jashtë shtëpisë, në kopshte apo në shkolla.

 

Nisur nga ky fakt, Ministria e Arsimit dhe Ministria e Punës dhe Politikës Sociale kanë përgatitur një rregullore për mënyrën e ushqimit të fëmijëve në kopshte dhe shkolla, të cilat këto institucione janë të detyruara ta respektojnë. 

 

“Me ndryshimet e reja ligjore, shkollat dhe drejtorët do të duhet të respektojnë rregulloren për ushqyerje dhe të kenë kujdes për cilësinë e ushqimit që u ofrohet. Ligji parasheh edhe sanksione për mosrespektimin e standardeve të të ushqyerit”,- deklaroi ministrja e Arsimit, Renata Deskovska Trenevska.

 

“Maqedonia si shtet është e varfër dhe një pjesë prej familjeve nuk mund t’u ofrojnë ushqim të balancuar fëmijëve të tyre. Prandaj, sistemi dhe shoqëria përmes kopshteve dhe shkollave duhet të ofrojë minimumin e vlerës së ushqimit që fëmijët duhet ta konsumojnë çdo ditë”,- tha ministrja e Punës dhe Politikës Sociale, Mila Carovska.

 

“Fëmijët që nga mosha e re duhet të konsumojnë shujta të balancuara edhe në kopshte, por edhe në shkolla që të krijojnë shprehi të shëndosha sepse ushqimi ka ndikim të madh në aftësinë për të mësuar”,- u shpreh përfaqësuesi i UNICEF-it, Benxhamin Perks.

 

Ushqimi në kopshte e shkolla nuk është problem vetëm i Maqedonisë. Edhe vendet fqinje kanë hapur tashmë debate për cilësinë e ushqimit që u ofrohet fëmijëve në institucionet arsimore dhe po bëhen përpjekje maksimale për të ndryshuar gjendjen e për t’u mundësuar fëmijëve të marrin të gjitha vlerat ushqyese që u nevojiten për moshën e tyre.