ShBA, mbështetje Britanisë për dëbimin e diplomatëve rusë
Shtetet e Bashkuara të Amerikës mbështesin vendimin e Britanisë së Madhe për të dëbuar 23 diplomatët rusë...
Shtëpia e Bardhë tha se “qëndron në solidaritet” me “aleatin e saj më të ngushtë” – Mbretërinë e Bashkuar – dhe se mbështet vendimin e saj për të dëbuar 23 diplomatë rusë.
Kryeministrja britanike, Theresa May, ka thënë se diplomatët do të dëbohen pasi Moska ka refuzuar të japë shpjegime se si një agjent nervor, prodhim rus, është përdorur për të helmuar një ish-spiun rus dhe vajzën e tij në Britani, më 4 mars.
Moska vazhdon të mohojë çdo përfshirje në sulm. Zëdhënësja e Shtëpisë së Bardhë, Sarah Sanders, akuzoi Rusinë për minimin e sigurisë së vendeve në gjithë botën.
Sanders tha përmes një deklarate se Shtetet e Bashkuara duan të sigurojnë se “ky sulm i neveritshëm nuk ndodh më”. Ish-spiuni rus, Sergei Skripal, dhe vajza e tij, Yulia, mbeten në gjendje kritike për jetën.