Rasti “Almiri”, prokurorët shqiptarë kundër rikualifikimit të veprës. Alispahiq: për seancat e ardhshme gjyqësore kërkojmë monitorim ndërkombëtar. Alispahiq: kërkojmë dënim maksimal për Boban Iliqin

Prokurorët shqiptarë në Prokurorinë Republikane, Ferat Elezi, Bashkim Besimi, Xhelal Bajrami dhe Ismail Dardhishta distancohen nga qëndrimi i Prokurorisë së Përgjithshme Publike rreth rikualifikimit të veprës në rastin e Almir Aliut nga “vrasje” në “vepër të rëndë kundër sigurisë së njerëzve dhe pasurisë në komunikacion”.

 

Në reagimin me shkrim të prokurorëve shqiptarë thuhet se me rikualifikimin e veprës janë bërë shkelje të rënda, veprime këto të cilat nuk i mbështesin katër prokurorët e lartpërmendur.                                                                                                                                                                                                                                                   

“Ne prokurorët pranë Prokurorisë Republikane të RM-së, që nga fillimi i shqyrtimit të këtij rasti në Prokurorinë Republikane kemi pasur qëndrim dhe akoma mbetemi të këtij qëndrimi se aktakuza nr. KO 697/16 prej 19.12.2016 e Prokurorisë Themelore të Kumanovës ka korresponduar plotësisht me veprimet e të akuzuarit siç ka qenë fillimisht i akuzuar për “vrasje” e paraprirë në nenin 123, alineja 2, pika 3 e Kodit Penal të RM-së”,- thuhet në komunikatën e Prokurorisë Republikane.

 

Këtë vlerësim profesional prokurorët shqiptarë ua kanë thënë edhe kolegëve të tyre edhe në mbledhje. 

 

Në ndërkohë, avokatët e familjes së Almir Aliut kërkojnë monitorim ndërkombëtar të procesit gjyqësor me qëllim të anashkalimit të çdo mundësie për gjykim jo të drejtë.

 

Avokati, Asmir Alispahiq, është i mendimit se në fjalët përfundimtare dhe në shqiptimin e vendimit gjyqësor përfaqësues të lartë të ambasadave të huaja duhen të jenë prezentë në gjykatë.                       

                                                                                                               

“Unë si avokat i familjes Aliu, në periudhën që vjen në vazhdimësi, do të kërkoj monitorim ndërkombëtar në seancat e ardhshme gjyqësore ku do të prezantohen fjalët përfundimtare. Ky monitorim është i domosdoshëm, sepse kemi të bëjmë me një test të madh për gjyqësorin në vend”,- u shpreh avokati i familjes Aliu, Asmir Alispahiq.

 

Alispahiq thotë se edhe pse rikualifikimi i kësaj lënde është në kundërshtim me provat materiale që i posedon mbrojtja, ai do të këmbëngul për dënimin maksimal ndaj të akuzuarit, Boban Iliq.       

                                            

“Unë vazhdoj të mendoj se veprimet e Boban Iliqit, që shihen edhe në video-incizimin, që janë të paraqitura si provë, ai duhet gjykuar për vrasje me paramendim, jo për aksident trafiku. Megjithëse rikualifikimi i lëndës tashmë e parasheh dënimin prej minimum 4 deri më 20 vjet dhe ne do të kërkojmë dënim maksimal ndaj të njëjtit”,- tha avokati i familjes Aliu, Asmir Alispahiq. 

 

Me kërkesë të prokurores, Kusigerska, gjykata pranoi rikualifikimin e veprës nga “vrasje” në “vepër të rëndë kundër sigurisë së njerëzve dhe pasurive në komunikacion”.

 

Pas rikualifikimit të lëndës, Boban Iliqi u lirua nga paraburgimi, ndërsa seancat gjyqësore për fjalët përfundimtare për këtë rast janë caktuar më 2 dhe 4 prill.