Tatimi progresiv, Tevdovski: 18% për të ardhura neto mbi 1000 euro; Angjushev: duhet pasur kujdes pragu normativ

Sipas Tevdovskit, të ardhura mbi 1000 euro në Maqedoni realizojnë rreth 2% e qytetarëve. Për ata që marrin më pak se 1000 euro, tatimi mbetet i njëjtë, pra në masën 10%.

 

Por, zëvendëskryeministri Angjushev kërkon që paraprakisht të bëhen analiza të thella rreth tatimit progresiv, pasi që, nëse lëshohet shumë poshtë pragut mbi të cilin do të ndryshonte norma e tatimit, kjo mund të shkaktojë revoltë tek qytetarët e klasës së mesme.

 

“Mendoj që në Maqedoni kur t’i shihni statistikat e sakta të DAP-it, diku rreth 2 për qind e qytetarëve janë ata që marrin të ardhura neto mbi 1 mijë euro. Mendojmë që aty është kufiri për masën e parashikuar, sepse kjo masë sigurisht nuk do të prek klasën e mesme të qytetarëve”,- deklaroi ministri i financave, Dragan Tevdovski.

 

“Ende nuk kemi marrë qëndrim për shumën se sa do të jetë më e ulëta. Ministri e ka mendimin e tij, por unë them se duhet shqyrtuar mirë në të gjitha aspektet dhe se sa efekti i kësaj mase do të jetë pozitiv”,- tha zëvendëskryeministri për çështje ekonomike, Koco Angjushev.

 

Nga Banka Botërore thonë se është e rëndësisë së lartë se si harxhohen financat publike dhe se duhet me patjetër të investohen këto të ardhura.

 

Nga Fondi Monetar Ndërkombëtar thotë se faktorë të rëndësishëm janë infrastruktura e mirë, sundimi i së drejtës dhe rritja e produktivitetit. Komentet u bënë në forumin “Ekonomia maqedonase mes vizionit dhe dilemës”.