Mbledhje komemorative në UT, përkujtohet puna e prof. dr. Flora Sela - Kastrati

Universiteti i Tetovës, me një mbledhje komemorative, ka kujtuar punën dhe kontributin e profesoreshës universitare, Flora Sela - Kastrati, e cila ndërroi jetë pak ditë më parë.

 

Të pranishmit vlerësuan punën dhe kontributin e saj në Fakultetin Filozofik.

 

“Prof. dr. Flora Kastrati, ndër vite ka dhënë kontribut të çmuar për edukimin e gjeneratave të tëra. Sikundër ka zhvilluar aktivitete të shumta si veprimtare e arsimit, shkencës dhe kulturës shqiptare, vepra e saj do të na udhëheq drejt dijes dhe përparimit”,- theksoi rektori i UT-së, Vullnet Ameti.

 

“Ishte gjithnjë e para që sakrifikoi veten, vetëm e vetëm që ne të realizojmë qëllimet tona. Ishte e palodhur e me punën e saj edhe të pamundurën e bënte të mundur”,- tha dekani i Fakultetit i Filozofisë, prof. dr. Ibish kadriu.

 

“Gjendem në mesin e mësuesve më të mirë. Gjendem në Tetovën heroike, në Tetovën e arsimit, sepse për herë të parë gjimnazi i plotë u hap këtu në Tetovë. Shkolla e parë normale, ku jam  gjenerata e parë, u hap gjatë vitit 50-51, këtu në Tetovë. Shkolla normale “Lira” - Tetovë, e cila si e tillë punoi 22 vite, në vitin 1972 u shndërrua në gjimnaz të plotë “Zef Lush Marku” në Shkup. Ta kisha në mesin tuaj edhe vajzën, por e mori Zoti”,- u shpreh babai i prof. Flora Sela - Kastratit, Idriz Sela.

 

Profesoresha, Flora Sela - Kastrati, punonte si mësimdhënëse e lëndëve filozofike dhe sociologjike në Universitetin Shtetëror të Tetovës.