Afganistan, helmohen 52 nxënëse

Dhjetëra nxënëse të një shkolle të mesme në provincën Helmand të Afganistanit janë dërguar në spital dhe zyrtarët dyshojnë se ato janë helmuar.

Shefi i Departamentit të edukimit në këtë provincë, Shah Safari, ka deklaruar se 52 nxënëse janë dërguar në një spital në Lashkar Gah.

Mjekët kanë deklaruar se vajzat e hospitalizuara kanë pasur kokëdhimbje dhe të vjella, duke shtuar se tashmë ato janë në gjendje stabile.

Nuk është ende e qartë se për çfarë lloj helmimi bëhet fjalë. Policia dhe ekspertët kanë dalë në vendin e ngjarjes dhe kanë nisur hetimet për këtë incident.

Shumica e provincës Helmand është nën kontrollin e talibanëve, të cilët kundërshtojnë edukimin e vajzave.