Fazliu: Kryetarët e komunave të jenë më të përgjegjshëm

Për shkak të borxheve të larta, disa komuna në vend aktualisht përballen me xhirollogari të bllokuara. Ministri i Pushtetit Lokal, Suhejl Fazliu, kërkoi nga kryetarët e komunave që të jenë më të përgjegjshëm dhe të përpilojnë plane afatgjate për menaxhimin e komunave, përfshirë edhe zvogëlimin e numrit të personave të punësuar. 

“Daljen nga kjo krizë të komunave unë së pari e shoh në menaxhimin më të mirë të udhëheqësve të komunave, të formojnë sektore me të punësuar profesionistë brenda komunave, të zvogëlojnë numrin e të punësuarve partiakisht, të rrisin numrin e atyre që kanë vlera dhe mund të kontribuojnë në menaxhimin më të mirë të komunave”,- deklaroi ministri i Pushtetit Lokal, Suhejl Fazliu.

Këtë Fazliu e theksoi në debatin e organizuar nga Ministria e Pushtetit Lokal për ndryshimet e Programit për zhvillim lokal dhe decentralizimin, në të cilin morën pjesë përfaqësues të komunave, të BNJVL-së dhe UNDP-së.

Përfaqësuesit e UNDP-së thanë se zhvillimi i barabartë rajonal është shumë i rëndësishëm për Maqedoninë. (Ersan Pajaziti, TVM2)