Osmani në Bruksel: Vij me lajme të mira, reformat brenda afatit

Zëvendëskryeministri për Çështje Europiane, Bujar Osmani, në kuadër të vizitës së tij në Bruksel, ka realizuar takim me përfaqësuesen e lartë të Bashkimit Europian për Punë të Jashtme dhe Politikë të Sigurisë, Federika Mogerini. Në takim, Osmani prezantoi progresin e implementimit të Planit “3-6-9”, si dhe progresin e realizimit të pengesave tjera politike në rrugën euro–integruese të Maqedonisë.

 

“Vij me lajme të mira nga Republika e Maqedonisë. Ashtu siç edhe premtuam para nëntë muajve, i bëmë brenda afatit reformat për Raportin e Komisionit Europian që pozitivisht të vlerësohet progresi ynë”,- theksoi Osmani në takim, duke iu drejtuar realizimit përkatës të Plani “3-6-9”, implementimi i së cilës përfundon me publikimin e Raportit të Komisionit Europian më 17 prill. "Edhe në këtë moment, në këto ditë të fundit, deri sa mbajmë këtë takim, në Kuvendin e Republikës së Maqedonisë po miratohen edhe ligjet e fundit reformuese, për të cilat është e nevojshme përkrahja e dy të tretave të deputetëve dhe për çka në momentin e fundit me opozitën u sigurua konsensusi i nevojshëm”,- theksoi Osmani. 

 

Në pjesën e shmangies së pengesave politike, Osmani theksoi miratimin e Ligjit për përdorimin e gjuhëve si segment fondamental i pjesës legjislative të Marrëveshjes kornizë, duke shprehur shpresë se implementimi i ligjit do të demonstrojë forcën e saj unifikuese në drejtim të ndërtimit të shoqërisë së fortë, të qëndrueshme, prosperuese dhe multi-kulturore të Republikës së Maqedonisë.

 

“Realizuam progres historik edhe në marrëdhënie me fqinjët. Nënshkruam, dhe pas saj e ratifikuam edhe në Kuvend Marrëveshjen historike për fqinjësi të mirë me Bulgarinë, si dhe realizuam progres të rëndësishëm në komunikim me Greqinë”,- theksoi Osmani, duke shtuar se në periudhën e ardhshme pret vendim edhe për kontestin shumëvjeçar me Greqinë, me të cilin do të shmangen të gjitha pengesat në rrugën euro-integruese të Republikës së Maqedonisë. 

 

Takimi Osmani - Mogerini realizohet në prag të publikimit të Raportit të Komisionit Europian për gjendjen dhe progresin e Republikës së Maqedonisë, i cili do të publikohet më 17 prill.