Naumovski, negociator i ri për emrin

Ish-zëvendëskryeministri për Eurointegrime i Maqedonisë, Vasko Naumovski, është  emëruar negociator nga pala e Shkupit, për vazhdimin e negociatave për kontestin e emrit me Greqinë. 

 

Naumovski, është  caktuar në  pozicionin e negociatorit të ri për kontestin e emrit, që deri tani kjo detyrë mbahej nga ish-ambasadori në  Uashington dhe ministri i sapoemëruar i Mbrojtjes, Zoran Jolevski.  

 

Presidenti, Gjorge Ivanov, priti në takim Zoran Jolevskin dhe Vasko Naumovskin, të dërguarin e mëparshëm dhe të ardhshëm të Maqedonisë për bisedimet që zhvillohen nën patronatin e OKB-së. 

 

Naumovski, është  negociatori i katërt i palës së Shkupit, që vjen në  këtë  detyrë  që  nga pavarësimi i vendit, kur edhe u shfaq problemi i kontestit të  emrit me Greqinë. Ky emërim vjen edhe në  prag të një vizite të  paralajmëruar nga ndërmjetësi i OKB-së, Mathew  Nimitz, në  Athinë  dhe më  pas në  Shkup,  për të  gjetur një zgjidhje për kontestin e emrit dhe për të përafruar qëndrimet e të dyja palëve.