Arrestimi i Fejzi Azirit, Spasovski: nuk u vonuam, e arrestuam sapo e gjetëm

Fejzi Aziri, njëri prej të akuzuarve në rastin “Monstra”, gjendet në masë arresti aktualisht në Klinikën për pulmologji në Shkup, e më pas do të dërgohet në burgun e Shtipit, ku duhet të vuajë dënimin prej 6 vitesh burg për veprën penale  “armëmbajtje pa leje”.

 

Mungesa e Azirit detyroi gjykatën të shtyjë dje rigjykimin e parë të rastit “Monstra”.

 

Aziri iu dha leje një muaj për të dalë nga burgu, por nuk u kthye më për të vazhduar dënimin. Mbrojtja e tij thotë se do të ankohet. Ministri i Brendshëm, Spasovski, thotë se arrestimi i Azirit nuk është i vonuar.

 

Për të akuzuarit, Alil Demirin dhe Afrim Ismailoviqin, që ende janë të pakapshëm për forcat e rendit, Spasovski tha se MPB ka informacione, por ato nuk janë për publikun. 

 

“Arrestimi i Fejzi Azirit aspak nuk është i vonuar. Në momentin kur personi u gjend, ai është vendosur në masa sigurie në Klinikën për pulmologji. Nuk kemi mundur t’i njoftojmë të gjitha mediat në momentin e arrestimit. Por, më pas njoftuam edhe mediat edhe burgun që ka lëshuar fletëarrestin apo kërkesën për burgosjen e tij. Në këtë aspekt, ky rast është sqaruar”,- tha ministri për Punë të Brendshme, Oliver Spasovski.