BE: Të hetohet vrasja e katër palestinezëve në Gaza

Bashkimi Evropian i bëri thirrje ushtrisë izraelite që të përmbahet dhe të mos përdorë forcë ndaj protestuesve të paarmatosur, duke bërë thirrje për hetim të plotë, pasi u vranë katër persona në protestat e fundit në Rripin e Gazës.

“BE i bën thirrje forcave të mbrojtjes së Izraelit që të mos përdorin forcë vdekjeprurëse ndaj protestuesve të paarmatosur”, ka thënë përmes një deklarate zëdhënësja e shefes për Politikë të Jashtme dhe Siguri të BE-së, Federica Mogherini.

“Siç e kemi thënë në vazhdimësi, prioritet duhet të jetë parandalimi i çdo përshkallëzimi të mëtejmë të dhunës dhe humbjes së jetëve”, thuhet në deklaratë, ku po ashtu bëhet thirrje për “hetim të plotë, në mënyrë që të kuptohet se çfarë ka ndodhur realisht”.

Të premten, katër persona, përfshirë një person me nevoja të posaçme dhe një 15-vjeçar, u vranë gjatë përleshjeve në mes të forcave izraelite dhe protestuesve në kufirin Izrael-Rripi i Gazës.

Prej disa javësh, në Rripin e Gazës palestinezët po protestojnë.

Sipas Ministrisë palestineze të Shëndetësisë, gjithsejt 39 palestinezë janë vrarë gjatë protestave.

Palestinezët po kërkojnë që refugjatët e zhvendosur të kthehen në shtëpitë e tyre, në territorin që e kontrollon Izraeli.