Shkupi prezanton ofertën turistike, “Multi etnicitet” përmes valleve maqedonase. Shilegov: Shkupit po ia kthejmë shkëlqimin e vjetër

Sheshi i Shkupit gjëmoi nga daullet, muzika dhe vallet tradicionale maqedonase, që u treguan të pranishmëve se Shkupi është qytet tërësisht i pastër etnik.

 

Të paktën këtë përshtypje të linte prezantimi i sotëm, ku nuk u interpretua asnjë fragment nga kultura e pasur e etniteteve të tjera që jetojnë në kryeqytetin tonë shumëetnik.

 

Gjithsesi, edhe përkundër mungesës së valleve shqipe, rome, turke, serbe apo boshnjake, ruta turistike e autobusëve synon t’u prezantojë turistëve kulturën e pasur multietnike, kulturore dhe fetare të Shkupit, duke filluar nga Çarshia e Vjetër, deri tek arkitektura e Kenzo Tanges, e lidhur me tërmetin katastrofal, si shenjë e solidaritetit ndërkombëtar me kryeqendrën e Maqedonisë.

 

Sivjet, në Shkup gjatë verës nuk do të shikohen as të rinjtë e veshur si partizanë e komitë, që nga qeveria e kaluar u përdorën si atraksion shtesë për turistët.

 

Sipas Shilegovit, me pak kreativitet, Shkupi mund të kthehet në një qendër të denjë turistike, sepse ka potencial të pashfrytëzuar për zhvillimin e turizmit, i cili, nëse përdoret në mënyrën e duhur, do të sjellë përfitime të mëdha sidomos për qytetarët e kryeqendrës. 

 

“Për fat të keq, këto 8 vitet e fundit, oferta turistike e Shkupit u vulgarizua me promovimin e ndërtimeve të projektit kriminal “Shkupi 2014”, që lanë nën hije vlerat e vërteta turistike. Po i kthejmë shkëlqimin e vjetër Shkupit, duke pasuruar edhe ofertën tonë turistike me objektet moderne, që realisht do të tërheqin turistët e huaj. Qëllimi ynë është që turistët që vizitojnë Shkupin, të marrin me vete në vendet e tyre përvojën më të mirë, të denjë për kryeqytetin tonë, sipas shembullit të kryeqendrave të tjera botërore dhe europiane”,- tha kryetari i Qytetit të Shkupit, Petre Shilegov.