BE, më pak fonde për anëtarët që rrezikojnë sundimin e ligjit

Komisioni Europian ka propozuar shtimin e mbrojtjes financiare për të luftuar vendet anëtare të BE që vënë në rrezik sundimin e ligjit dhe vlerat europiane. Propozimi i KE është një kundërpërgjigje e drejtpërdrejtë ndaj regjimeve euroskeptike dhe populiste të Polonisë dhe Hungarisë.

 

Bashkimi Europian do të shkurtojë fondet për vendet anëtare që dobësojnë sundimin e ligjit dhe rrezikojnë të kompromentojnë paratë e taksapaguesve europianë.

 

Kështu deklaroi Komisioni Europian në propozimin e përbashkët të buxhetit për periudhën 2021-2027.

 

Plani vjen në përgjigje të udhëheqësve euroskeptikë dhe populistë në Poloni dhe Hungari, ku qeveritë kanë shtuar presionin ndaj mediave kritike dhe grupeve jo-qeveritare, kanë promovuar një retorikë të ashpër anti-emigracionit dhe kanë ndryshuar sistemin gjyqësor kundër standardeve demokratike.

 

Mënyra si blloku europian trajton lëkundjen e qeverive të saj nga vlerat liberale dhe sundimi i ligjit, është kthyer në një sfidë kyçe për të ardhmen e Bashkimit Europian, që tashmë është dëmtuar nga Brexit.

 

Largimi i Britanisë do të lërë pas një hendek të madh në buxhetin e ardhshëm të bllokut dhe propozimi i Komisionit Europian tashmë do të diskutohet nga 27 vendet e mbetura dhe Parlamenti Europian.

 

Komisioni propozoi mjete të reja për të “pezulluar, zvogëluar dhe kufizuar aksesin ndaj financimeve europiane” për vende që nuk mund të sigurojnë shpenzimin e duhur të fondeve të bllokut, për shkak të mangësive në sundimin e ligjit.

 

Komisioni gjithashtu deklaroi se do të krijonte një program të ri për të promovuar “shoqëritë e hapura, demokratike, gjithëpërfshirëse dhe kreative, duke vënë përpara vlerat europiane, diversitetin kulturor e gjuhësor dhe trashëgiminë.”/Ora News