Trump njofton sot, për vendimin e tij rreth paktin bërthamor me Iranin

Përmes një postimi në Twitter, presidenti amerikan të hënën ka njoftuar se do ta bëjë publik vendimin e tij lidhur me këtë çështje, të martën në orën 14, sipas kohës lokale në Uashington.

Presidenti amerikan është kritikues i marrëveshjes së arritur më vitin 2015 në mes të Iranit dhe fuqive botërore, e cila i mundëson Teheranit lehtësim të sanksioneve në këmbim të frenimit të programit bërthamor.

Trump kishte kërkuar që fuqitë evropiane, nënshkruese të kësaj marrëveshje, të përmirësojnë ato që ai i cilëson “të meta të tmerrshme” të paktit.

Ai ka thënë se Irani ka shkelur “shpirtin e marrëveshjes”.

Ndërkaq, presidenti iranian, Hassan Rohani, më herët ka paralajmëruar Shtetet e Bashkuara se “do të pendohen” nëse tërhiqen nga pakti bërthamor.