“Eko Guerilla”, kritika pushtetit lokal në Tetovë

Organizata joqeveritare “Eko Guerilla” ka lëshuar sot një sërë kritikash ndaj pushtetit lokal në Tetovë.

Sipas kësaj organizate, komunën e Tetovës edhe 9 maji i sivjetmë, kur shënohet Dita e Europës, e gjeti pa transport publik, pa gjelbërim, pa parkingje nëntokësore dhe me infrastrukturë të shkatërruar rrugore si dhe shumë mungesa tjera.

“Sot, në Ditën e Europës, jetojmë në një qytet ku pluhuri në rrugët e lagjeve tona ende është pjesë e përditshmërisë për fëmijët tanë. Rrugët e qytetit tonë nuk pastrohen si në Europë, por pastrohen vende-vende ende si në shekullin e XIX, pa makineri dhe infrastrukturë moderne. Shkaktare për sëmundjet respiratore të fëmijëve është pikërisht pluhuri që ata thithin nga ambienti. Sot, në Ditën e Europës, Tetova është qyteti me më pak hapësira të gjelbra. Edhe ato pak hapësira që kishin mbetur po betonohen çdo ditë. Sot, në Ditën e Europës, policia e trafikut në Tetovë është bashkëfajtore dhe e paaftë për ta zgjidhur kaosin e trafikut në qytet. Sot, në Ditën e Europës, Tetova vazhdon të mbetet pa transport publik”,- tha Arianit Xhaferi nga “Eko Guerilla”.

Sipas Xhaferit, kryetarja e komunës së Tetovës, Teuta Arifi, nuk po i mbaN premtimet ndaj qytetarëve edhe pse ka premtuar se të gjitha mjetet financiare nga buxheti I komunës do të jenë transparente. (Visar Sadiki, TVM2)