Gjykata Penale, filloi gjykimi për lëndën “Titanik 2”

Në Gjykatën Penale në Shkup filloi procesi gjyqësor për lëndën “Titanik 2”, e që ka të bëjë me parregullsitë zgjedhore në zgjedhjet lokale të 2013.

Në këtë lëndë të PPS-së, të dyshuar janë lideri i PDSh-së, Menduh Thaçi, ish-drejtori i DBK-së, Sasho Mijallov, si dhe ish-anëtarët e KShZ-së, Bedredin Ibraimi, Aneta Stefanovska, Vllatko Stojkovski dhe Sashe Srcev.

Gjykatësi i lendes, Ognen Stavrev, në seancën e kaluar i pranoi kërkesat e palës mbrojtëse për anulimin dhe caktimin e seancës së re gjyqësore për ditën e sotme, me qëllim të shqyrtimit të tekstit të azhurnuar paraprakisht të aktakuzës që e ndau prokurorja speciale, Fatime Fetai.

Në seancë e sotme të pranishëm ishin të gjithë të akuzuarit, me ç’rast që në fillim të seancës, njëri nga të akuzuarit, Bedredin Ibraimi, kërkoi që avokati i Menduh Thaçit të jetë edhe avokati i tij, me ç’rast kjo u bë shkas që sërish të kërkohet anulim të seancës gjyqësore me qëllim të njoftimit me lëndën e re. Gjykatësi i lëndës refuzoi kërkesën e avokatit dhe kërkoi nga PPS të fillojë me fjalimin hyrës.

Më pas, Bedredin Ibraimi kërkoi që aktakuza të jetë e përkthyer edhe në shqip dhe më pas kjo u shtrua edhe si kërkesë edhe nga ana e Menduh Thaçit.

Gjykatësi i lëndës pranoi kërkesat e të akuzuarve anuloi seancën deri në plotësimin e kërkesave të tyre. Avokati mbrojtës, Lubço Shvrgovski, kërkoi të matet niveli i oksigjenit në sallë, sepse, sipas tij, hapësira gjyqësore në një objekt të vjetruar të Gjykatës nuk i plotëson kushtet për mbajtjen e seancave gjyqësore për këtë lëndë.