MPB: tregti me lëndë narkotike, gjashtë në pranga

Ministria e Punëve të Brendshme ka arrestuar pesë persona nga Maqedonia, një i gjashtë është arrestuar në Serbi, nën akuzën e tregtisë me lëndë narkotike, në bashkëpunim me një tjetër grup trafikantësh.

 

Personat u arrestuan pas aksionit të policisë që kontrolloi disa lokacione në Tetovë dhe Prilep, gjatë të cilave u siguruan edhe dëshmitë materiale rreth transporteve të organizuara të kokainës dhe marihuanës. Aksionet për këtë grup kanë filluar qysh në vitin 2017.

 

“Ministria e Punëve të Brendshme dje, gjatë orëve të mbrëmjes, ka arrestuar pesë persona nga grupi në Maqedoni, ndërsa personi i gjashtë i arrestuar është në Serbi. Gjatë vitit 2017, në territorin e Republikës së Serbisë janë konfiskuar 130 kilogram marihuanë, 500 gram kokainë dhe 1330 gram përzierje, të cilat ky grup ka dashur që t`i transportojë në Republikën e Maqedonisë dhe Serbisë”,- deklaroi zëdhënësi i MPB-së, Toni Angelovski.

 

B. E., 43 vjeçar nga Tetova, e N. D, 33 vjeçar nga  Prilepi, kanë blerë kokainë me vlerë prej 25 mijë euro në Belgjikë, si dhe substancat për përzierje.

 

Droga duhej të transportohej në Maqedoni e  Serbi. N. D. është kapur në kalimin kufitar Serbi - Maqedoni, por ka arritur të ikë nga policia, kurse vetura e tij Mercedes ka mbetur në kufi, ku janë gjetur sasi tjera droge.

 

Paratë për drogën e Belgjikës janë dhënë nga E. A. 35 vjeç nga Prilepi. Në këtë grup janë edhe  J. I. , 41 vjeç nga Tetova, i cili e ka blerë marihuanën dhe e ka fshehur në Kosovë.

 

Ai bashkë me  A. M.,  53 vjeç po nga Tetova, e kanë ngarkuar drogën  në maunën e 70 vjeçarit I. I. për ta transportuar në Serbi.

Ndaj tyre është ngritur kallëzim penal për prodhim të paautorizuar dhe lëshim në përdorim të drogave narkotike, substancave psikotrope dhe prekursorëve.