Përplasja me Gruevskin, Xhaferi për N1: Rreflektim i krizës personale të tij. Flamuri në zyrën time, simboli i shqiptarëve

Kryeparlamentari, Talat Xhaferi, gjatë vizitës në Serbi, është trajtuar me një vëmendje të shtuar edhe nga mediat serbe të cilat ishin të interesuara sidomos për ngjarjet e 27 prillit të kaluar në Kuvend.

Në një intervistë për Televizionin N1, në vëmendjen e gazetarit ka qenë edhe marrëdhënia e Xhaferit me ish-kryeministrin, Nikola Gruevski, e iniciuar sigurisht nga pamjet e përcjella nga mediat gjatë seancës parlamentare për Ligjin e gjuhëve. Sjelljen e Gruevskit në atë seancë, Xhaferi e arsyetoi me tensionet e shtuara politike të asaj periudhe edhe në vetë partinë e ish-kryeministrit.

“Vlerësoj se është reflektim i një krize personale, se nuk ka mundur të kontrollohet në momentin e dhënë. Unë thashë, në atë seancë prisja gjithçka, por assesi nuk prisja se Nikolla Gruevski do të jetë ai që do të reagonte në atë mënyrë”,- deklaroi kryetari i Kuvendit, Talat Xhaferi.

Pa dyshim nuk kishte si të mos kalonte jashtë vëmendjes gazetareske edhe zgjedhja e një ish-komandanti të UÇK-së në krye të parlamentit të Maqedonisë, e pa dyshim edhe flamuri shqiptar, që është pjesë e zbukurimeve të zyrës së kryeparlamentarit të Maqedonisë, i cili shtron pyetjen kurioze të gazetarit se përse Xhaferi mban flamurin e një shteti tjetër në zyrë.

“Flamuri në kabinetin tim nuk është vetëm flamuri i Shqipërisë, ngase flamuri shqiptar i Republikës së Shqipërisë përjetohet si flamuri kombëtar i të gjithë shqiptarëve kudo që jetojnë dhe në këtë kontekst dhe ky flamur më prezanton mua si pjesëtar i popullit shqiptar, e jo si shtet apo institucion, dhe nuk ka shkaqe dhe sqarime tjera”,- theksoi kryetari i Kuvendit, Talat Xhaferi.

Para kthimit në Shkup, Xhaferi u  ndal edhe në komunën e Preshevës për një takim me kryetarin e komunës, Shqiprim Arifin. (Zeqirja Mexhiti, TVM2)