Nju Jork, fillojnë bisedimet për emrin, mundësi e mirë palët t’i përafrojnë qëndrimet

Dy diplomatët do të kenë mundësi ditore për t’i përafruar qëndrimet për të arritur në opsionin e mundur për zgjidhjen e kontestit, nën ombrellën e Kombeve të Bashkuara  dhe të ndjekura nga ShBA-të dhe Gjermania.

 

Ministri Dimitrov në Nju Jork do të paraqesë opsionin “Maqedonia e Ilindenit”, gjersa Athina zyrtare refuzoi këtë opsion, ndërsa ministri Kocias ka deklaruar se zgjidhja do të kërkohet nga pakoja e ndërmjetësit Nimic. 

 

Ndërkohë, mediat greke kanë përfolur se takimi në Nju Jork mund të jetë edhe final në kuptim të gjetjes së një emri i cili do të ishte i pranueshëm për të dy palët.

 

“Maqedonia e Re” dhe “Maqedonia e Epërme” janë variante të mundshme për zgjidhje, shkruajnë mediat greke. Çështja e emrit padyshim ka qenë temë e bisedimeve në takimin paraprak të ministrit  Dimitrov me sekretarin e përgjithshëm të Kombeve të Bashkuara, Antonio Guteresh.

 

“Me vizion dhe udhëheqësi të të dyja palëve kemi shans historik  ta mbyllim një kontest historik disadekadash”,- është shprehur  Dimitrov. 

 

“Negociatat  për emrin”, ishte tema kryesore edhe në duelin televiziv mes kryeministrit Zaev dhe kryetarit të VMRO- DPMNE-së, Hristijan Mickovskit, mbrëmë në Radio Televizionin e Maqedonisë. 

 

Kryeministri Zaev ripërsëriti se opsioni “Republika e Maqedonisë së Ilindenit” jo vetëm që e ruan, por edhe e përforcon identitetin.