“Republika e Maqedonisë së Veriut”, Jashari: zgjidhje që do të figurojë në dokumente; Latifi: përdorimi “erga omnes”, i realizueshëm

Profesori universitar, Hasan Jashari, në emisionin debativ në “Argument” në TVM2, thotë se edhe dy propozimet tjera të ndërmjetësit, Metju Nimic, sikurse “Republika e Maqedonisë së Re” dhe “Republika e Maqedonisë së Epërme” nuk janë edhe shumë të favorshme, por cilado zgjidhje do të figurojnë vetëm në dokumente. 
                         

“Sa i përket këtu opinionit publik në Maqedoni, asnjëra prej tyre nuk është e dëshirueshme, mirëpo nëse e kemi patjetër, duhet diçka të zgjidhet, atëherë secili prej këtyre propozimeve mund të jetë një emër i ri sa për sy e faqe, sepse realisht të flasim në dokumente do të ekzistojë kjo, mirëpo në jetën e përditshme përsëri edhe në komunikimet ndërkombëtare mbas një viti – dy, përsëri do të jetë ajo e vjetra, në biseda gjithashtu si Republika e Maqedonisë. Këto janë vetëm çështje që do të jenë aktuale derisa janë këto struktura politike edhe derisa të zgjidhet emri”,- u shpreh profesori universitar, Hasan Jashari.                                                                                                        

 

Profesori, Shpëtim Latifi, takimet e Nju Jorkut dhe Brukselit i sheh si frytdhënëse dhe thotë se pas arritjes së zgjidhjes, ndryshimi i kushtetutës dhe përdorimi gjithpërfshirës, “erga omnes”, i emrit, do të jetë i realizueshëm. Në shkëmbim të kësaj, sipas Latifit, e rëndësishme është që në zgjidhje të mos cenohet identiteti dhe gjuha maqedonase.                                                                                                                 

“Çështja e kushtetutës dhe precizimi i përdorimit të emrit është çështje teknike dhe juridike, dhe si e tillë nuk ka pse të jetë e vështirë të precizohet. Kompromisi që bëhet në favor të Maqedonisë, vërtetë është se duhet të mbrohet emri i kushtetutës, por të garantohet edhe identiteti nacional dhe gjuhësor i maqedonasve, para së gjithash me atë që nuk do të preket pala maqedonase në kuptim etnik dhe do të ruhet mbiemri ose do të ruhet identiteti kombëtar nacional maqedonas”,- theksoi profesori universitar, Shpëtim Latifi.

 

“Maqedonia e Ilindenit”, sipas profesorëve, u refuzua pasi që ishte më shumë defokusim i opinionit se sa propozim konkret për zgjidhje.