Çështja e emrit, Kotzias: Është koha për “po” ose “jo”

Ende asnjë paralajmërim për bisedën telefonike mes kryeministrit, Zoran Zaev, dhe homologut tij grek, Aleksis Cipras, e cila duhet të ndodh deri të premten. Përderisa Athina pret thirrjen e kryeministrit Zaev, ky i fundit u thirr në çështje teknike. 

 

Ndërkohë, ministri grek i Punëve të Jashtme, Nikos Kotzias, për televizionin shtetëror grek ka deklaruar se propozimi “Maqedonia e Vardarit” është hedhur poshtë si mundësia më e mirë e zgjidhjes së çështjes së emrit. Ai ka thënë se është koha për “po”, ose “jo”, për një nga tre mundësitë e mbetura, që të gjendet një zgjidhje kreative.

 

“Maqedonia Veriore, Maqedonia e Epërme, ose Maqedonia e Re janë propozimet e mbetura në tavolinën e bisedimeve, pas hedhjes poshtë të Maqedonisë së Vardarit, dhe në ditët në vijim mund të arrihet zgjidhja”,- ka deklaruar Kotzias.

 

Sipas tij, marrëveshja është një pajtim i mirë nga i cili do të përfitojnë të dy vendet. Ai sqaroi se propozimi i hedhur poshtë nuk është pranuar nga Shkupi, ndërsa thekson se vendit fqinj i ka kërkuar që të ofrojnë propozime tjera, përpos atyre të ndërmjetësuesit Matthew Nimetz.

 

Kotzias madje shpalos se opozita e tanishme e Maqedonisë, atëbotë në qeverisje, e kishte pranuar propozimin “Republika e Maqedonisë - Shkupi”, si formulë e dyfishtë, pa kusht për përdorim të përgjithshëm – “erga omnes”.