ShGM, Selmani: Dhuna ndaj gazetarëve, e papranueshme; MPB, Spasovski: Zero tolerancë kundër lirisë së fjalës

 

“Jemi të një mendimi me partnerët tanë se dhuna ndaj punonjësve të medias është një praktikë e papranueshme për një vend demokratik. Si një element i rëndësishëm në funksionimin e proceseve demokratike, ata kanë të drejtë të punojnë në një mjedis pa kërcënime dhe presione. Misioni i tyre për të informuar qytetarët dhe për të kërkuar llogari nga secila qeveri nuk do të përmbushet nëse ata punojnë në kushte frike dhe pasigurie”,- tha kryetari i ShGM-së, Naser Selmani.

 

Ministri i Brendshëm, Oliver Spasovski, mbetet në qëndrimin për zero tolerancë ndaj dhunës së gazetarëve. Sipas tij, nga 1 qershori 2017 janë regjistruar 12 raste për rrezikim të sigurisë së gazetarëve dhe të gjitha janë mbyllur.

 

“Për fat të keq, në vitet e fundit kemi dëshmuar sulme të shumta dhe presione ndaj gazetarëve. Nuk ka justifikim për sulme të tilla. Qëndrimi i qeverisë është i qartë dhe e përsërisim atë në mënyrë të përsëritur: zero tolerancë për çdo përpjekje për të rrezikuar lirinë e fjalës dhe shprehjes! Çdo sulm ndaj gazetarëve ashpër do të gjykohet dhe do të sanksionohet!”,- deklaroi ministri i brendshëm, Oliver Spasovski.

 

Shefi i misionit ë OSBE-së, Xhef Goldstajn, tha se dialog i hapur midis gazetarëve dhe policisë është i mundshëm dhe i dobishëm në favor të qytetarëve. Ai sqaroi se dhuna përmban shumë aspekte.

 

“Nuk flasim vetëm për dhunën fizike dhe verbale, ajo mund të jetë edhe paraburgim i paligjshëm, shkatërrim i pronës, sulm arbitrar në redaksi apo shtëpitë e gazetarëve, gjuhë e urrejtjes, sulm në rrjetet sociale dhe kërcënim për sulme seksuale ndaj gazetarëve femra”,- u shpreh ambasadori i OSBE-së, Xhef Goldshtajn.

 

Punëtoritë janë pjesë e përpjekjeve për të përmirësuar bashkëpunimin midis gazetarëve dhe policisë, që kanë për qëllim përfaqësuesit e policisë të njoftohen me rëndësinë e rolit të gazetarëve, në informimin e qytetarëve rreth ngjarjeve me rrezik të lartë.