Punësimi në administratë, anketa e “Brima”-s: Ekzistojnë ndikime partiake

Tek qytetarët ende ekziston përshtypja se mungon transparencë gjatë punësimit në administratë veçanërisht pas zgjedhjeve, njofton “TVM2”.

Pjesa më e madhe e të anketuarve besojnë se dominojnë ndikimet partiake, korrupsioni dhe nuk ekzistojnë shanse fer për të gjithë për t’u pranuar në aparatin shtetëror. Hulumtimi i Agjencisë “Brima” thotë se e nevojshme është që të punohet në përmirësimin e përzgjedhjes gjatë punësimit sipas meritave, duke u bazuar në aftësi profesionale.

“I ulët është perceptimi për t’i parë gjërat pozitivisht. Perceptimi për administratën publike dhe procesin e punësimit është shumë negativ që na detyron të mendojmë që edhe në rast se ekzistojnë reforma të reja, e gjithë kjo do të has në barriera”,- tha Fani Qimova nga Agjencia “Brima”.

PAVLEVSKI: FOKUSI NË SHËRBIMET CILËSORE

Nga pushteti vendor thonë se 12 vitet e fundit administrata është dyfishuar nga tre mijë në gjashtë mijë të punësuar. Sipas tyre, fokusi duhet të vihet në dhënien e shërbimeve cilësore, pasi që nga ajo varet funksionimi i suksesshëm i administratës.

“Kjo na inkurajon në rrugën që kemi nisur, në profesionalizimin e plotë të administratës publike”,- u shpreh zëvendësministri i pushtetit vendor, Dejan Pavlevski.

ZHAGAR: GATI STRATEGJIA PËR REFORMA

Në Ministrinë për Shoqëri Informatike dhe Administratë thonë se është përgatitur strategjia për reforma në administratë për pesë vitet e ardhshme.

“Ta përzgjedhim kandidatin i cili ka shumë kompetenca për atë vend pune, dhe kur flas për kompetenca mendoj për kualifikime profesionale, por për të gjitha shkathtësitë e nevojshme që të kemi administratë të shpejtë, efektive dhe profesionale.” - tha Biljana Zhagar, këshilltare në ministrinë për shoqëri informatike dhe administratë.

Hulumtimet tregojnë se pas zgjedhjeve me ndërrimin e pushtetit, zakonisht po ndërrohet edhe 90% e udhëheqësisë së administratës. (Meral Ismaili, TVM2)