Aleanca për Shqiptarët: jo leje për punë “Jugohromit” pa i vendosur filtrat

Aleanca për Shqiptarët kërkon që Qeveria të trajtojë në mënyrë të barabartë të gjitha subjektet ekonomike, duke mos lejuar anashkalimin e rregullave ligjore të cilat e dëmtojnë direkt jetën e qytetarit për interesin e biznesit.

“Jugohrom” prodhon ferosilicum. Ashtu edhe siç tha zëvendëskryeministri Angjushev nga foltorja e Parlamentit, çmimi i ferosiliciumit në bursën botërore është 1,500 dollarë për 1 ton, më i larti në 10 vite sipas ekspertëve.

“Prandaj po bëhet gjithë ky presion që të fillohet me punë që të kapet tregu deri sa çmimi i shitjes është kaq i lartë”, potencojnë nga ASh.

Sipas tyre, Fabrika “Jugohrom”, në asnjë mënyrë nuk mund të fillojë me punë pa plotësimin e standardeve dhe vendosjen e filtrave  për mbrojtje nga ndotja e ajrit.

Aleanca për Shqiptarët përkujton se “një nga kushtet për çeljen e negociatave është edhe lufta me krimin e organizuar dhe korrupsionin, por edhe më tej në Maqedoni vazhdojnë koordinimet e biznesit me qarqe të larta qeveritare”.

Nga ASh madje thonë se tani ka edhe diskriminim etnik, pasi në Manastir Ministria e Brendshme ngriti kallëzimin penal për ELEM-in dhe ish-drejtorët, të cilët me veprimet e tyre rrezikuan  shëndetin dhe ambientin e qytetarëve.

E njëjta përgjegjësi duhet të kërkohet edhe për rrezikimin e jetës së qytetarëve edhe në Tetovë dhe rajonin e Pollogut.


Këtu kemi korrupsion dhe krim të organizuar dhe kjo ka kosto në shëndetin e qytetarëve, akuzon ASh.