Gjendet zgjidhje për “eurokompozit”, hua prej 11 mln denarë për pagesën e dy rrogave

Është gjetur një zgjidhje për momentin për të punësuarit në ndërmarrjen “Eurokompozit” nga Prilepi, të cilët protestuan me tenda javën e kaluar para qeverisë, duke kërkuar t’u paguhen 18 rrogat e prapambetura dhe kontributet për sigurim shëndetësor dhe pensional për gjashtë vitet e kaluara.

Në mbledhjen e fundit,  qeveria obligoi drejtuesit e ndërmarrjes eurokompozitë të huazojnë 11 milionë denarë për t’u paguar dy nga pagat e prapambetura të punësuarve. Po punohet që për ta të gjendet një zgjidhje afatgjatë, njëjtë si për të punësuarit në “Feni”.

“Në seancën e saj të 78, qeveria mori vendim që të ndryshojë vendimin e seancës së kaluar të 77 dhe në pajtim me vendimin e ri e obligoi Kompaninë “11 Oktomvri – Eurokompozit nga  Prilepi” të dërgojë kërkesë për huazim prej 11 milionë denarëve (6 milion denarë nga ELEM-i dhe 5 milion denarë nga MEPSO-Shkup). Me këtë ndryshim, të punësuarve nga kjo kompani në vend të një rroge, do të paguhen dy rroga”,- tha zëdhënësi i qeverisë, Muhamet Hoxha.