Hahn mesazh Xhaferit: parlamenti kyç në procesin “screening”

Eurokomisari për zgjerim, Johanes Hahn, në kuadër të vizitës së tij në Shkup ka realizuar takim edhe me kryeparlamentarin, Talat Xhaferin, që padyshim temë e bisedimeve ka qenë procesi i eurointegrimit të Maqedonisë, respektivisht fillimi i fazës së ashtuquajtur proces  “skrining”. 

 

“Me vendimin e Këshillit Evropian për hapjen e bisedimeve në qershor të vitit të ardhshëm, është treguar se anëtarët e BE-së kanë përcjellë mesazh të qartë se vlerësojnë hapat që ka realizuar Maqedonia në reforma dhe në politikën e fqinjësisë së mirë”,- ka deklaruar kryeparlamentari Xhaferi.

 

Ai ka siguruar eurokomisarin Hahn se kuvendi në tërësi është i përqendruar në vazhdimin e mëtutjeshëm të arritjes së reformave dhe të japë rezultate konkrete.

 

Nga kabineti i Xhaferit thonë se eurokomisari Hahn ka përshëndetur rezultatin e arritur ndërsa ka ritheksuar përkrahjen e bashkësisë ndërkombëtare për Maqedoninë drejt integrimit euroatlantik.

 

Hahn ka vënë theks të veçantë në rolin e parlamentit në procesin e harmonizimit të ligjeve vendore me ato evropiane, apo në procesin e skriningut.

 

Hahn dhe Xhaferi kanë spikatur gjithashtu nevojën e fokusimit në arritjen e obligimeve në të gjitha fushat, të cilat Maqedonia duhet t’i realizojë, kushte që kanë dalë nga marrëveshja e Prespës, njëherit që janë edhe kërkesa të BE-së dhe NATO-s.