Prishtinë: Iu dha lamtumira e fundit Adem Demaçit

Me nderime të larta shtetërore, në prani të një numri të madh të qytetarësh dhe zyrtarë nga të gjitha trevat shqiptare, në “Varrezat e Dëshmorëve” në Prishtinë u varros veprimtari i çështjes kombëtare, Adem Demaçi.

 

Nën përcjelljen e Gardës Kombëtare të Forcës së Sigurisë së Kosovës dhe të shumë qytetarëve, trupi i pajetë i Demaçit u soll në Velani, pas cremonisë komemorative ku të pranishmive iu drejtua Abetarja, vajza e Adem Demaçit, e cila tha se e kishte një baba që e ndau me të gjith shqiptarët, prandaj ai ishte babai i kombit.

 

“Unë kisha një baba që e ndava me të gjith shqiptarët sepse ai edhe mua më ka konsideruar si një pjesë të popullit të vet. Ndërsa mesazhi që ma dha pasi u sëmur ishte më e rëndësishmja është ta njohësh veten. Ishte njeri që u sakrifikua për shqiptarizmin. Po ta njihnin shqiptarët mirë veten do përpiqeshin ta përmirësonin veten dhe në mënyrë kritike të luftohej e keqja”. Kështu si jemi nuk e njohim veteveten, nuk e dim rëndësinë e bashkimit prandaj do të na përsërit historia”, shprehet vajza e Adem Demaçit, Abetare Demaçi.

 

Në Ceremoninë komemorative në Sheshin Skënderbeu, në Prishtinë Liderët politikë shqiptarë lartësuan figurën dhe kontributin e Demaçit për lirinë dhe pavarësinë e Kosovës.

 

“Kosova qe dy ditë është në zi, bota shqiptare në pikëllim. Sot më 28 korrik kombi shqiptar po ndahet fizikisht nga Adem Demaçi, një kolos që u vetë-mohua tërë jetën për qëllimin madhor lirinë dhe pavarësinë e Kosovës dhe bashkimin kombëtar”…Bota pa ndahet nga Mandela i Europës. Adem Demaçi me tërë qenien e tij fizike, mendore, intelektuale dhe morale jetoi për një qëllim: pavarësinë e Kosovës, çlirimin nga Serbia dhe bashkimin kombëtar. Ai i flijoi 28 vjet në burgjet jugosllave, pa u thyer dhe mposhtur”, tha presidenti i Kosovës, Hashim Thaçi.

 

“Në jetën e tij ai asnjëherë nuk u dorëzua e nuk u step. I dashur baca Adem, jeta jote ishte luftë dhe ti këtë luftë e fitove, jeta jote ishte sakrificë, por ti ia dole t’i kalosh ato me urtësi e qetësi”, theksoi presidenti i Shqipërisë, Ilir Meta.

 

Demaçi ndërroi jetë në moshën 82-vjeçare,  më 26 korrik, në shtëpinë e tij në Prishtinë. Përveç veprimtarisë së tij patriotike Adem Demaçi la pas vete edhe krijimtarinë e tij letrare. Ndër veprat më të njohura të tij është romani “Gjarprinjt e gjakut”.