Hoxha: Stabiliteti i jep më shumë perspektivë biznesit

Biznesi kërkon siguri, investuesit kërkojnë stabilitet. Bizneset janë të vetëdijshëm se një vend stabil, ku funksionin shteti ligjor dhe rregullat, është parajsë për tërheqjen e investimeve të huaja. Për të diskutuar pikërisht perspektivën që i hapet vendit nga anëtarësimi në NATO dhe BE, funksionarë të lartë të BDI-së u takuan sot me bizneset e Odës Ekonomike të Maqedonisë Veri-perëndimore.

“Ne si Odë Ekonomike gjithmonë edhe në strategjinë tonë e kemi pasur si pikë kyçe në zhvillimin ekonomik të vendit. Zhvillimi ekonomik  i vendit është kyç i lidhur me një stabilitet dhe siguri të vendit dhe kjo do të thotë se një vend i cili ka aspirata dhe dëshiron të kyçet në BE, kjo nënkupton edhe një perspektivë më e mirë për vendin”,- u shpreh kryetari i OEMVP-së, Nebi Hoxha.

OSMANI: ANËTARËSIMI NË NATO, MË TEPËR ZHVILLIM EKONOMIK

“Diku para 15 viteve, Maqedonia dhe Estonia ishin në një pikë sa i përket BPV-së dhe tani pas anëtarësimit të Estonisë në BE dhe NATO, kemi një lëvizje drastike të zhvillimit atje dhe një ngecje këtu tek ne. Kjo është pasqyra e qartë se çka do të thotë NATO dhe BE për biznesit për ekonominë, për investimet e huaja për vendet e reja të punës, për paga më të larta, për arsim cilësor për shëndetësi më cilësore”,- u shpreh zëvendëskryeministri, Bujar Osmani.

Osmani thotë se Qeveria është në shërbim të odave ekonomike dhe biznesit për të lehtësuar mundësinë e zhvillimit tregtar, që natyrisht do të ndikojë edhe në BPV, por edhe në të mirat drejtpërdrejt që ndikojnë në xhepin e qytetarëve. (Zekirja Mexhiti, TVM2)