Amnisti për “27 prillin”, VMRO dorëzon propozimin ligjin në kuvend

VMRO-DPMNE dorëzoi në kuvend propozim ligjin për amnisti të të dyshuarve, akuzuarve dhe të dënuarve për dhunën e 27 prillit në kuvend. Partia e Mickovskit kërkon miratim në procedurë të përshpejtuar të ligjit.

Danev: Zaev dhe Sela të rishikojnë propozim ligjin

Sipas koordinatorit të grupit parlamentar, Dragan Danev, personat e përfshirë nuk janë terroristë.  Ai ftoi liderët e partive politike që të mbështesin ligjin, siç u shpreh, për pajtesë të vërtetë nacionale.

“Ftojmë të gjitha partitë politike, edhe zoti Selën, zotin Zaevin, ftojmë edhe liderët e partive tjera politike, të shohin ligjin dhe nëse kanë dëshirë të marrin pjesë në miratimin e ligjit, do të ketë edhe debat amendamentesh ku do të kenë mundësi të dorëzojnë amendamente. Për të gjithë punët jemi të gatshëm që të bisedojmë dhe negociojmë”,- tha Dragan Danev nga VMRO-DPMNE.

Kostadinov: Refuzojmë propozimin e VMRO-së

Nga LSDM dolën me përgjigje se nuk do të mbështesin ligjin,  pasi që  nuk do të lejojnë ndërhyrje flagrante në gjyqësor.

“Ende nuk e kam parë propozim ligjin për amnisti të VMRO-DPMNE-së, por që nga fillimi qëndrimi ynë është i qartë, se ne e refuzojmë këtë ligj. Pas këtij pajtimi nuk qëndron amnisti në asnjë formë. Gjyqësorin do të duhet ta lëmë anash nga përplasjet tona politike”,- tha deputeti i LSDM-së, Kostadin Kostadinov.

Zaev: Pajtesa, vetëm në kuvend

Kryeministri, Zoran Zaev, thotë se pajtesa do të duhet të bëhet në kuvend e jo me ndërhyrje në gjyqësor. Sipas Zaevit, në trupin për pajtesë nacionale në krye me kryeparlamentarin, Talat Xhaferi, do të merrnin pjesë koordinatorët e të gjitha grupeve parlamentare.

“Absolutisht është i papranueshëm propozimi i VMRO-së, pasi që këtu formojmë trupin koordinativ nacional. Në këtë trup të pajtesës do të duhet të gjejmë mekanizmat e pajtesës, duke mos ndikuar mbi procesin e drejtësisë”,- deklaroi kryeministri, Zoran Zaev.

VMRO këtyre ditëve do të kumtojë qëndrimin për pjesëmarrje në Komisionin për pajtim, por konsiderojnë se me këtë promovohet drejtësi selektive. (Meral Ismaili, TVM2)