Kurz: Nëse Kosova e Serbia arrijnë marrëveshje, BE mbështet korrigjimin e kufirit

 

“Askush nuk do të jetë kundër asnjë marrëveshje. Austria do të pajtohet me cilëndo marrëveshje që arrihet mes Kosovës dhe Serbisë. Nga ana jonë do ta ketë mbështetjen e plotë, edhe nëse është korrigjimi i kufijve apo shkëmbimi i territoreve, pra këtë marrëveshje do ta mbështes BE-ja. Për të arritur paqe, siguri në Ballkanin Perëndimor, një gjë është shumë e rëndësishme: një dialog i suksesshëm mes Beogradit dhe Prishtinës dhe përfundimi i dialogut me marrëveshje të përbashkët. Lus të gjithë qytetarët që ta mbështesin këtë projekt sepse është hap i nevojshëm drejt perspektivës evropiane”,- deklaroi kancelari i Austrisë, Sebastian Kurz.

 

Marrëdhëniet e mira me fqinj janë qenësore në kontekst të integrimit evropian të Kosovës dhe Serbisë, deklaroi me këtë rast presidenti i Kosovës, Hashim Thaçi.

 

“Kosova mbetet thellësisht e përkushtuar në dialogun me Serbinë, për arritjen e një marrëveshjeje gjithëpërfshirëse, që nënkupton normalizimin e marrëdhënieve dhe pajtimit që nënkupton njohjen reciproke dhe anëtarësimin e Kosovës në OKB. Jam i bindur që marrëveshja gjithëpërfshirëse do të sjellë paqe të qëndrueshme për popujt tanë dhe paqe dhe stabilitet për Ballkanin Perëndimor dhe të ardhme të sigurt evropiane për dy vendet tona”,- u shpreh presidenti i Kosovës, Hashim Thaçi. 

 

Qëndrimin për mbështetjen e marrëveshjes Kosovës-Serbi që do të përfshinte edhe korrigjimin e kufirit apo shkëmbimin e territorit, kancelari austriak, Kurz, e ka përsëritur edhe në takimin me kryeministrin e Kosovës, Ramush Haradinaj, i cili njihet si kritik i qëndrimit të presidentit Thaçi.