Hulumtimi i opinionit, qytetarët: Policia e korruptuar, besim i ulët tek institucionet

Qytetarët janë të ndarë në përqindje të barabartë rreth vlerësimit të punës së policisë, ndërsa mbi  60% vlerësojnë se është i pranishëm korrupsioni në polici. Kështu ka rezultuar hulumtimi i opinionit nga organizatat civile “Ipsos” dhe “Analitika tink-tenk” për punën e institucioneve.

“Perceptimi  është se rreth 62-63% e të anketuarve vlerësojnë se korrupsioni në polici është i përhapur në nivel shumë më të lartë, ndërsa  sa i përket  kryerjes së detyrës së policisë, gjysma e anketuarve kanë thënë se janë të kënaqur nga puna e saj, ndërsa gjysma tjetër shprehin pakënaqësi”,- theksoi Magdallena Llembovska nga “Analitika Tink-Tenk”.

Sipas këtij hulumtimi, në përgjithësi vërehet besim i ulët i qytetarëve në të gjitha institucionet, mediat dhe OJQ-të. Më shumë se gjysma e të anketuarve nuk i besojnë gjyqësorit, prokurorisë, komisionit për anti-korrupsion, inspektoratit tregtar dhe shëndetësisë. 37% e të anketuarve janë shprehur se nuk ndjehen të sigurt, ndërsa thuajse asnjëherë qytetarët nuk mund të mbështeten te dikush për të zgjidhur problemet që kanë.

“Perceptimi i përgjithshëm i anketuesve është se ka korrupsion në të gjitha institucionet. Besim të ulët pikërisht për këtë arsye vërehet tek prokuroria dhe gjyqësia”,- theksoi Magdallena Llembovska nga “Analitika Tink-Tenk”.

Profesorët universitarë përshëndesin masat e autoriteteve policore për të afruar policinë tek qytetarët, por theksojnë nevojën imediate për të punuar në ndryshimin e vetëdijes së punonjësve policorë.

“Shumë duhet të punohet me realizimin e trajnimeve, edukimeve të ndryshme si dhe ndryshimin e vetëdijes së punonjësve policorë”,- tha profesori universitar, Trpe Stojanovski. (Rexhep Qamili, TVM2)