“Titanik” shtyhet për më 23 nëntor, PSP fajëson gjykatën për arratisjen e Gruevskit

 

“PSP në të gjithë periudhën e kaluar vazhdimisht ka apeluar dhe ka dorëzuar kërkesë për masën e paraburgimit të të akuzuarit, Nikolla Gruevski, dhe të gjithë të akuzuarve tjerë në rastin “Titanik””,- tha prokurorja në Prokurorinë Speciale Publike, Lile Stefanova.

 

Prokuroria kërkoi që Gruevski të gjykohet në mungesë, propozim ky që u kundërshtua nga mbrojtja, e cila kundërshton edhe paraburgimin e Jankievskit dhe Bozhinovskit.

 

“Nuk ka ndonjë arsye të mos ndahet procedura, pse të gjykohet në mungesë dhe të bëhen harxhime të panevojshme. Sa i përket Janakievskit dhe Bozhinovskit, nëse do të kishin pasur për qëllim që të arratisen, sigurisht që nuk do të gjendeshin në shtëpi nga organet kompetente”,- tha avokati, Alen Milanov.

 

Fjalën e saj se nuk do të arratiset e dha ish ministrja e brendshme, Jankullovska, e cila nuk pret që edhe për të gjykata të japë vendim paraburgimi. 

 

“Për mua ka të shqiptuara masa nga ana e gjykatës, i respektoj të njëjtat dhe mendoj se nuk ka nevojë për shqyrtim të vendimit të gjykatës, ose shqiptimin e masave tjera”,- tha ish ministrja e brendshme, Gordana Jankullovska.

 

Seanca e radhës për rastin “Titanik” është paraparë të mbahet më 23 nëntor.