Dhënia e azilit për Gruevskin, Hahn pret sqarim të vlefshëm nga Orban

Bashkimi Evropian ka kërkuar nga kryeministri hungarez, Viktor Orban, të japë sqarime për dhënien e azilit ish kryeministrit, Nikolla Gruevski. Eurokomisari për zgjerim, Johanes Hahn, madje është habitur nga një vendim i tillë.

“Nëse vendimi konfirmohet, pres sqarime dhe arsyetime nga Viktor Orban. Sundimi i së drejtës paraqet parim fondamental  për shtete anëtare të BE–së dhe ato kandidate. Kjo është vendimtare për kredibilitetin e Europës. Na surprizon përkrahja e Hungarisë ndaj Maqedoninë për t’u bërë anëtare e BE-së, por  njëkohësisht e konsideron shtet të pasigurt”,- shkruan në twitter eurokomisari, Hahn.

BE PRET KONFIRMIM ZYRTAR NGA HUNGARIA

Nga Komisioni Evropian thonë se tani për tani nuk kanë marrë vërtetim se Hungaria i ka dhënë azil politik ish kryeministri Gruevski. 

“Presim nga të gjitha palët të sillen në pajtim me rregulloret relevante pa e politizuar rastin. Megjithatë, sipas të drejtës europiane dhe ndërkombëtare, vendet anëtare vendosin individualisht për kërkesat e azilit”,- thonë nga KE.

DIMITROV: PARADOKSALE, NJË VEND I  BE-SË MBRON TË DËNUARIN

Ministri i jashtëm, Dimitrov, pajtohet se vendimi i Hungarisë shkel kredibilitetin e sundimit të së drejtës në BE.

“Është paradoksale që një vend i BE-së t’i japë mbrojtje një të gjykuari. Ky është problem për Maqedoninë, por megjithatë  edhe për Bashkimin Evropian dhe për kredibilitetin e parimit  të sundimit të së drejtës në BE”,- u shpreh ministri i jashtëm, Nikolla Dimitrov.

Dimitrov për këtë rast do të diskutojë haptas me homologun e tij hungarez, Sijarto, në margjina të Samitit të NATO-s, më 4 dhjetor. (Nermin Mulaki Fejzullahu, TVM2)