Miratohet rezoluta e Shqipërisë në PE

Ky raport ka marrë 459 vota “pro” në favor të raportit të vitit 2018 për Shqipërinë, që do të thotë se Parlamenti Europian i jep mbështetje rekomandimit për çeljen e negociatave për në BE.

 

Raporti i eurodeputetit Fleckenstein përmban 48 pika, nga ku që në fillim mbështetet rekomandimi i Komisionit për çeljen e negociatave me BE, kjo pasi njihet progres në reformat e ndërmarra, megjithatë kjo do të varet nga progresi i këtyre reformave.

 

Në këtë raport të miratuar nga Parlamenti Europian, Shqipërisë i kërkohet ndryshime ligjore dhe administrative, duke përmbushur rekomandimet e OSCE/ODIHR-it për zgjedhjet.

 

Këto ndryshime,- thuhet në raport,- duhet të ndodhin përpara zgjedhjeve vendore të 2019-s dhe se partitë politike kanë obligimin të mbajnë larg kandidatë me të shkuar kriminale.

 

Në këtë raport, bojkoti parlamentit nga opozita që prej verës së 2018-s cilësohet si një shqetësim i madh dhe kërkohet rikthimi i dialogut brenda institucioneve demokratike.

 

Ndërsa për procesin e vettingut kërkohet avancim dhe një proces i pavarur me standardet më të larta ndërkombëtare. Raporti shpreh shqetësimin për mosgjetjen e gjuhës së konsensusit nga klasa politike shqiptare për miratimin e ligjeve të tjera të reformës në drejtësi.

 

Raporti përshëndet dhe mbështet luftën e nisur me krimin e organizuar.

 

Gjithashtu Shqipërisë i kërkohet të forcojë masat për të shkatërruar dhe ndaluar burimet financuese për terrorizmin dhe të merret seriozisht me radikalizmin, që përhapet online përmes internetit.