Propozim buxheti për 2019-n, Zendeli: Hetime financiare para përfundimit të teatrit

Investimet në kulturë, bllok dotacionet për komunat shqiptare, arsimi dhe mbrojtja sociale përplasën Besën opozitare dhe BDI-në.

Fadil Zendeli tha se me propozim buxhetin e vitit 2019 vetëm 1% nga dotacionet për kulturë shkojnë në komunat ku ka shumicë shqiptare, ndërkaq pa u zbardhur keqpërdorimet financiare në ndërtimin e Tetarit Kombëtar në Shkup, planifikohen të ndahen 50 milion denarë.

“Të pastrohet një dilemë: a ka keqpërdorime ose nuk ka, për shkak se vite të tëra shtyhet ndërtimi apo rindërtimi i këtij teatri, flitet për keqpërdorime të mjeteve financiare dhe në esencë vijmë këtu dhe duhet të japim komplimente se sivjet ia arritëm brenda buxhetit të rrumbullakojmë këtë çështje”,- tha Fadil Zendeli nga Lëvizja Besa.

ISMAILI: MBËSHTESIM PROJEKSIONIN, PËRFSHIRË EDHE TEATRIN

Rexhail Ismaili tha se BDI mbështet projeksionin e buxhetit të ardhshëm, përfshirë këtu edhe mjetet që ndahen për teatrin.

“Kemi thënë se të gjitha institucionet le të revidojnë punët ku janë kuadër i BDI-së. Këtë vit do të përfundojnë punimet në teatrin e Shkupit dhe pjesa e pagesës së punëve që do të përfundojnë këtë vit mbetet për t’u paguar në vitin e ardhshëm”,- tha Rexhail Ismaili nga BDI.

FINANCIMI I KULTURËS PËRPLASI VMRO-NË DHE TEVDOVSKIN

Investimet në kulturë përplasën VMRO-në me ministrin e financave, Dragan Tevdovski.

“Buxheti i sivjetmë i Ministrisë së Kulturës nuk bazohet në strategjinë nacionale për zhvillimin e kulturës të cilën shumica parlamentare e miratoi dhe e cila sipas logjikës do të duhej të paraqiste udhëheqës për përpilimin e buxhetit”,- u shpreh Magdalena Manaskova nga VMRO-DPMNE.

“Për mbrojtjen e trashëgimisë kulturore, nëse bëjmë krahasim me buxhetin paraprak, mjetet janë rritur në 415 milion denarë”,- tha ministri i financave, Dragan Tevdovski.

Të ardhurat e përgjithshme në buxhetin e 2019-s janë projektuar në 210,8 miliard denarë, ndërkaq shpenzimet në 228,5 miliard denarë. Rritja e GDP-së parashikohet në 3.2 %, ndërkaq shkalla e inflacionit në 2%. (Meral Ismaili, TVM2)