Sheqerinska: Ia dorëzuam NATO-s programin e reformave

 

“Presim që ky program të përkrahet nga vendet anëtare të NATO-s dhe presim në procedurë të shpejtë, në fillim të vitit 2019, me përfundimin e amendamenteve kushtetuese në parlament, Maqedonia praktikisht të ulet në tavolinën e NATO-s. NATO nuk pret programi të realizohet në muajin mars, por qëllimi është të sigurohen hapat e sigurt, që do të realizohen në periudhën kur do të bëhet paralelisht edhe nënshkrimi i protokollit të vendeve anëtare të NATO-s”,- tha ministrja e mbrojtjes, Radmilla Sheqerinska.

                

Nga integrimi në NATO vendi do të ketë edhe përfitime ekonomike, thonë ekspertët. Por, ata theksojnë nevojën e sundimit të së drejtës si indikator kryesor për thithjen e investimeve të huaja si dhe rritjen e buxhetit për mbrojtje, me qëllim që të  sigurohet përqindja për buxhetin që i takon Aleancës veri-atlantike. Ata presin që të sillet participimi diku si në Shqipëri dhe Mal të Zi, respektivisht përqindje adekuate në raport me BPV-në.

 

“Sipas propozim buxhetin për vitin 2019, mund të shohim se për mbrojtje është rritur buxheti për 31 milion euro. Për ta arritur 2% nga BPV, duhet ta rritim buxhetin për mbrojtje shkallë-shkallë secilin vit për 0,25% nga BPV. Këto mjete duhet të sigurohen në ndonjëfarë mënyre”,- tha ekonomistja, Ivana Velkovska.

 

Gjithsesi me integrim të plotë në NATO nuk përfundojnë problemet tona. Nevojitet forcë dhe kapacitet për të transformuar shtetin, me qëllim që qytetarët të gëzojnë jetë më të mirë, thanë panelistët në debatin mbi efektet e anëtarësimit të Maqedonisë në NATO, të organizuar nga Instituti për politikë europiane.