Interpol-i, në kërkim të Lavdërim Muhaxherit
Interpol-i, ka pranuar kërkesën e autoriteteve të Kosovës që Lavdërim Muhaxheri të përfshihet në sistemin e kërkimit të Policisë Ndërkombëtare.......
Vendosjen e Muhaxherit, që aktualisht po lufton në Irak, nën emblemën e Shtetit Islamik të Sirisë dhe Levanit, në listën e të kërkuarve të Interpolit e ka konfirmuar për mediat në Kosovë Gjykata Themelore në Ferizaj.
Organizata Ndërkombëtare e Policisë Kriminale, ka pranuar kërkesën e Gjykatës Themelore të Ferizajt, e cila e kërkon Muhaxherin për veprime të terrorizmit dhe organizim të grupeve për të shkuar në Siri e Irak.
Sahit Krasniqi, gjykatësi që ka lëshuar vendimin e fletëarrestit ndërkombëtar për Muhaxherin, ka konfirmuar se nga Sektori për Bashkëpunim Ndërkombëtar i Ministrisë së Drejtësisë është njoftuar se kërkesa për fletëarrest ndërkombëtar është aprovuar. Në këtë mënyrë, prej tani Muhaxheri do të jetë njëri nga të kërkuarit e Interpolit.
Përderisa për Muhaxherin është lëshuar fletëarrest ndërkombëtar, sipas Gjykatës, ekziston edhe një grup tjetër personash, ndaj të cilëve janë aplikuar masat e përgjimit, pikërisht nën dyshimet për terrorizëm.
Fletëarresti për Muhaxherin është kërkuar nga Prokuroria Speciale më 2 maj të këtij viti.